X
تبلیغات
رایتل

جان مار ته فدامه (شعر مازندرانی)

پنج‌شنبه 17 مرداد‌ماه سال 1392 ساعت 11:13 ق.ظ

جان مار ته فدامه

 

جان مار ته فدامه

چش انتظاری نکن

ته اصلی دور بگردم

هی بیقراری ، نکن

 

روز و شوی ناختی

مه برمه جا ، بیداری

هی گره ره تو دایی

نصفه شو تا صواهی

 

ته خنده دور بگردم

مه دل ره جلا دنه

ته دلواپسی مره

تب زنده بلا دنه

 

 

ته کله ی اسبه می

درسی ، آسمونه

ته رنگی رنگی چرقد

مه وسه سایمونه


ته دسه پینه ی دور

چنده ترک دوسه

ته نیمچه سوی قربون

نم نم  پرک دوسه

 

بی تو دنیاره کورمه

هر چن غریبه جامه

ته پیش امبه ، جان مار

بوم تا ته فدامه

 

یاده مره دوش گیتی

تکون دایی پشته سر

لاقمه ره دهون گیتی

چکه زویی سفره سر

 

بازار شیهی ، لنگن سر

مومله کردی ، تیناری

زوخ کردمی ، خرینسی

خردنی و شلواری

 

ته تلاشه سه بوم

صواحی تا نماشته

فکا زوئی لتکاره

واش و علف که داشته

 

کهنه چادر کمر سر

دپش دوسی داشتی

دشته کنار تیل چه جور

لچر تا  اوسی داشتی


کتک زوئی لوبیا

باکله ی ماریمه

پاتی یواش دونه پاچ

سازه زوئی شه دیمه

 

ته سره دور بگردم

سرپیته کش بار گیتی

آسوک آسوک تو متی

د دسی شلوار گیتی

 

خسه تن و خسه لینگ

خنه تو هم کار بیهی

سمباره بن دون بلار

شه شام و ناهار بیهی

 

کله سره  ، ته پلا

هیچ وقت مه یاد نشونه

ته پوف و چشه اسلی

اون وقت مه یاد نشونه

 

 گد بهیمه ته زمر

ادب مره ور بدا

ته درس و مشق  ات خله

گدی مره پر بدا

 

چه مزه دارنه امروز

اینتا شعر نوپایی

ریکا ماره سه تم تم

دل بنویشته، فدایی


***

میر حمزه طاهری هریکنده ای نوپا

بندر عباس 27/04/92

 
del.icio.us  digg  newsvine  furl  Y!  smarking  segnalo