X
تبلیغات
رایتل

چش انتظار پسر ...

دوشنبه 7 مهر‌ماه سال 1393 ساعت 11:30 ق.ظ

 

چش انتظار پسر  ...


نماشــونه نمـویی تن نخاره

وارش بیته هـــوا دل بیقراره

خدایا تــوم هکن مه انتظاره

چنده من هـارشم درازه راره


خدایا دتا چش کم سو بهییه

خنه دائم تـه بک و بـو بهییه

 

پسر بی تو بهـار بـویی ندارنه

لت و لتکا دیگـه سویی ندارنه

دتا چش دیگه مه خویی ندارنه

بیشه ره اینجه آهــویی ندارنه


خدایا دتا چش کم سو بهییه

خنه دائم تـه بک و بـو بهییه

 

 

کـوچه سر نیشتما تا تو دگردی

لالالا خــــوندما تا تــو دگردی

ونگ کمبه شه خدا تا تو دگردی

انتظار تــوم بــوا تا تـو دگردی


خدایا دتا چش کم سو بهییه

خنه دائم تـه بک و بـو بهییه

 

برو تی تی داره تن مشته سوهه

لـم و لـواره تن مشته کـوکوهه

ونـوشه در بمـــو ته بک و بوهه

تمومه دشت و صحرا سبزه سوهه


خدایا دتا چش کم سو بهییه

خنه دائم تـه بک و بـو بهییه

 

دیشو خــو بـدیمـه من چلچلاره

ونگ دمبه من همش جان خداره

سر هـــدامه هـوا سر شه صداره

بیاره مـــه پلـی جــانه ریکـاره


خدایا دتا چش کم سو بهییه

خنه دائم تـه بک و بـو بهییه

 

آخـر بمـو ملـه مه جانه ریکا

بیاردنه مـه سه چـن تا هسکا

سره جـم بهینه همـه رفـــقا

کشه زمبه تو دمبه شه وره کا


خدایا دتا چش کم سو بهییه

خنه دائم تـه بک و بـو بهییه

***

میر حمزه طاهری هریکنده ای نوپا

 

del.icio.us  digg  newsvine  furl  Y!  smarking  segnalo