تقدیم به مادرم که چهل روز در بین ما نیست ...

چهل روز است هنوز دلها بیقرانند و چشمها بارانی است و این دلنوشته زبان مادری ام است. تقدیم می شود به مادری مهربان و دلسوز که حاکی از تلاش و زحمت او در زندگی می باشد که هیچ وقت از خاطرم فراموش نمی شود.

جان مار ته فدامه  /  چش انتظاری نکن

ته اسری دور بگردم / هی بیقراری ، نکن

روز و شوی ناختی / مه برمه جا ، بیداری

هی گره ره تو دایی / نصفه شو تا صواهی

ته خنده دور بگردم  /  مه دل ره جلا دنه

ته دلواپسی مره  /  گج کنده  بلا دنه

ته کله ی اسبه می  /  درسی ، آسمونه

ته رنگی رنگی چرقد  / مه وسه سایبونه

ته دسه پینه ی دور /   چنده ترک دوسه

ته نیمچه سوی قربون  / نم نم  پرک دوسه

بی تو دنیاره کورمه / هر چن غریبه جامه

ته پیش امبه ، جان مار / بوم تا ته فدامه

یاده مره دوش گیتی  / تکون دایی پشته سر

لاقمه ره دهون گیتی / چکه زویی سفره سر

بازار شیهی ، لنگن سر / مومله کردی ، تیناری

ذوخ کردمی ، خرینسی / خردنی و شلواری

ته زحمته سه بوم  / صواحی تا نماشته

فکا زوئی لتکاره  / واش و علف که داشته

کهنه چادر کمر سر /  دپش دوسی داشتی

دشته کنار تیل چه جور / لچر تا  اوسی داشتی

کتک زوئی لوبیا  / باکله ی ماریمه

پاتی حیاط دونه پاچ / سازه زوئی شه دیمه

ته سره دور بگردم / سرپیته کش بار گیتی

آسوک آسوک تو متی / د دسی شلوار گیتی

خسه تن و خسه لینگ / خنه تو هم کار بیهی

سمباره بن دون بلار / شه شام و ناهار بیهی

کله سره  ، ته پلا  / هیچ وقت مه یاد نشونه

ته پوف و چشه اسلی / اون وقت مه یاد نشونه

 گد بهیمه ته زمر /  ادب مره ور بدا

ته درس و مشق  ات خله / گدی مره پر بدا

دیگه بوردی جانه مار /  پر بزویی آسمون

بوردی خدای سامون / راحات بهی تو مهمون

چهل روزه دل پر از غم / چشه اسری بن ننه

هچی کلکسر شومه  /  مامان کبری تن ننه

مه جانه مار زندگی  /  هفتاده رد نکرده

شیشتا پسر دتره / نداشتی گت هکرده

ماه تی تی ره آسمون / خله پیغوم هدامه

حتی غریبه جاره  / مامان ته نوم هدامه

چی بوم من ته نومه / نمونه ای فرشته

شک نکمبه ته جا هم / خدای ور بهشته

خله دله تش بزو  /  اینتا شعره جدایی

ریکا مارسه تن تن / شعر بنویشته فدایی

طاهری دنیا دله  /  یاد اون روزا هکن

تا ته نفس رج هسه  / شه مامانه یاد نکن

***

میر حمزه طاهری هریکنده ای نوپا