تقدیم به مادر که یکسال بدون او زندگی گذشت ...

تقدیم به یک سال بدون تو ...

اتا سال  توم  بیه  دل بیقراره

ته جا خالی یه مامان ته بلاره

بهار اتی  پیدا  بیه  پیدا نی

غم و غرصه کوفا بیه پیدا نی

ته یاد و نوم مه خاطر برقراره

گل و شمع سوسو زنده ته مزاره

چشه اسری ته وسه بیه وارش

کیجا  ته سه هنتا کنده نواجش

ته ور صلح و صفا مه یاد نشونه

نماشون ونگه وا مه یاد نشونه

دتا چش ته وسه کم سو بهییه

خنه دیگه ته بک و بو بهییه

ته مزار نیشتمه شمعه سو کمبه

ته هامته  جاره امبه  بو کمبه

مامان تره دور و اینتی نخوامبه

بهار بی ته گل و تی تی نخوامبه

چشه اسری سونه وارش بهییه

تن و په درد کنده ناخش بهییه

مامان ته دوری مره پیر هکرده

برمه  دیم و دیاره شیر هکرده

ته عکسه ناز دمبه طاقچه بالا

تو  دمبه  خوندمه  لالایی لالا

ته خاطر دل سامون یور نشونه

ته ذکر و فکر خدایی دور نشونه

امه خنه ی سو پر بزو  بوردی

همش خو ویمبه خو پر بزو بوردی

وجین کردی صحراره ته بلاره

دعا کردی اماره ته بلاره

ونگ کردی شه خداره ته بلاره

دوس داشتی دیر راره ته بلاره

تو اونجه در پناه شه خدایی

تو از زخم و جراحت هم شفاهی

بورم آسونه سر دخیل دوندم

سبزه پارچه ره اونجه ذیل دوندم

آخه مریض بیهه آرزو داشته

همش شه تن پیرن سیو داشته

دعا کمبی همش یاد ننامی

خدای ور که دری روبرامی

ته شاعر چند تا بنده رو هکرده

شه دل ره با بنویشتن سو هکرده

طاهری نومه ماره یاد هکرده

غریبی ونه روحه شاد هکرده

***

میر حمزه طاهری هریکنده ای نوپا