مل عمو جان (شعر مازندرانی تبری) ...

ملمو جان ...

(خاطراتی از ایام دور تقدیم به ملا عموی مکتب خانه ما)

قــدیـم و خـلـه سالــه ، ملمو جان

دل ور گـپ و حــاله ، ملمو جان

ته خـاطـر هنتا بیشاره مـه سرتن

یـاد هکـردن محـاله ، ملمـو جان

امه جـوز، تکـه پیش و مـلاخنه

همش ماسی مه باله ، ملمو جان

دســا لینگـه فلـک ره یـاد نکمبه

اموهه شونگ و ناله ، ملمو جان

نشونه یاد ته جایزه ، کـه داهـی

آغـوز و پـرتقــالــه ، ملمو جان

هجی کردی جواب دامه ته همکت

الف لام ، دال و ذاله ، ملمو جان

خدایی خله درد داشته هلی شیش

دس و لینگ پزغاله ، ملمو جان

خشــالی بـاریکـــلا مــزه داشته

جواب دامه سئواله ، ملمو جان

اسا مــدرسه دکـل تـرس دنیـهه

فلک نا ،عشق وحاله ، ملمو جان

کجـه بوردی ملمـوجـان بـوینی

کلاس و قیل و قاله ، ملمو جان

ته زحمت ره طاهری شعر بساته

اسـا چنده  خشالــه ، ملمو جان

شاعر: میر حمزه طاهری هریکنده ای نوپا