عیده نوروزه بوین ...

عیده نوروزه بوین…

ای دباره نــوبهــاره ، عیـد نــوروزه بـوین

بــورده  دیروز و الانم کـاره امروزه بـوین

گل بیشار و رنگی رنگی با صفا هسه همن

با  ونوشه  سبزه زار و  وقفه پیروزه بوین

  

کوه و صحرا ره چمر بیته اسا انه مه گوش

چکه  افرا و  سور و  توت  و آغوزه بوین

گل  هدا  شه تنه لا  سبزه  قوا  و  روسری

زرده  نـوجه  تیمه تال و خنده سوزه بوین

چلـه ره سـردی تمـوم و دل  وا کنده ، بنه

گل کتک ره  آشتی ی  بیل و گروازه  بوین

سفره وا بیه  به  نـومه هفتا سین  رج بهی

رقص ماهی  زلف سبزه  جشن نوروزه بوین

شاخه شاخه سر تی تی ، لتکا دله  بیه قشنگ

وقت خشی ،  ویشه  و  تیشه  و  دازه  بوین

سنبل  و  نرگس جا  ، بیه  بهار ،   روخنه لو

گـله سر، گنگلی  و  پاپلی   و   مــازه بوین

بوی نعنا کیله سر ،  دپیته اون  دشته  میون

تپه  شه  گـلامه تن  ، همبازی  و  نازه بوین

خش خــور  بیه هوا سر ،  چلچلای  نو بهار

پیر بهـوته  این مثاله ،  نکته و   رازه بوین

طاهـری دارنه مــوارک  ، امسال عیدی روز

تا  به سالی زنده و ، شعر و ورق  وازه بوین

***

میر حمزه طاهری هریکنده ای نوپا