تیناری سخته ...

تیناری سخته ...

انده ونگ هــدامه هیچکی مه ور تا اسا نمو

انده گــوش بکشیمـه مـه دوره ور صدا نمو

گــوم بیمه غــریبه شر خلتـومه کـه تینارمه

لــوج بیمه مـن درسی دیـاری ونگه وا نمو

  

چشــه اصلــی کـلنه نـــم نــم وارشه واری

برمه شیر کنده مره مه حال نخاره جـا نمو

درد دره مه دله ور غصه مره تپ بزوهه

درد خلــوهه زندگی مـه سرخنه صفــا نمو

اینجه نا صحـرا دره نا گـالشونه ونگه وا

هچـــی پنجـــه بـزومه ، چمـره للــوا نمو

گنی تقــدیر منه ! تا کی ونــه درد بکشم؟

مه کـار و بار زندگی ، فقـط کــه اشتبا نمو

همش ونگ کمبه خدا وه هسه دسه ماسنه

مه نفس از وه رجه ، دل ونه جا جدا نمو

اتی تب زمبی اما راحاتی ره  شه زندگی

نمبه شه درد دلـه ،  گمبــه مـه سر بلا نمو

مه حواس گوم بهییه هیچکی ره نشناسه وه

شاید دلتنگه ته سه ، ته ور ملـه ملا نمو

انـده شعـر بساتمـه ورق ورق بیـه کتاب

آخه سرنوشت مه ور اتا پریک وه را نمو

پیر بیمه مـه سر مــی درسی اسبه بهییه

مه دل بد کنده چمر هنتا خـاره صدا نمو

طاهری ی دل همش روش کشنه اتخله شعر

ونـه لب زمزمه دائم بجــز اون خــدا نمو

***

میر حمزه طاهری هریکنده ای نوپا